للإبلاغ عن أى حادث نصب على الشبكة العنكبوتية

بسم الله الرحمن الرحيم

انتشرت في الفترة الأخيرة مواضيع نصب من شباب نفوسهم ضعيفة واستحلوا مال الناس بدون وجه حق ومابقاش يفرق معاهم حلال من حرام وبقت موضة ان كل واحد من دول يخش عالمنتديات والمواقع المشهورة عشان يحط فيها موضوعه أو رسالته اللي مالهاش هدف غير النصب على خلق الله ومحاولة الحصول على رصيد الموبايل بأي شكل من الأشكال.

ولعل من أشهر الأمثلة عن هذا الموضوع:

1- النصب بطريقة الكود اللي بيحول الرصيد
2- النصب عن طريق تقديم خدمات من على الانترنت مقابل رصيد على الموبايل، وطبعا بتكون الفيزا اللي اتعمل بيها الخدمات دي مسروقة وبتلاقي الخدمة اتوقفت بعد شهر ولا شهرين بدون سبب ولما تراسل الشركة يقولولك أصلك حرامي ومشتري الخدمة بفيزا مسروقة، وبالتأكيد صاحبنا اللي انت حولتله الرصيد بيبقى ساعتها فص ملح وداب وغير رقم موبايله وابقى هاته لو تعرف...

وكمان الوظائف الوهميه
وفيه حاجه كمان فظيعه جدا انا اكتشفتها صدفه
(شوفو دماغ المصريين)
تلاقى واحد عارض سلعه بسعر رخيص جدا علشان تتصل بيه
وبعد ماتتصل بيه يفتح معاك مليون حوار .
انتا منين وساكن فين وبتشتغل ايه واحنا عرفنا رجاله
ويقولك للاسف السلعه دى اتباعت بس انا بكره هيجيلى غيرها وارخص كمان وتكلمه تانى وتالت ورابع
المهم الراجل ده هدفه انك تكلمه كتير علشان خطه موبينيل وبياخد دقائق مجانيه على الاستقبال هههههههههه

لازم انا وانت وهو وكل واحد يتنصب عليه أو يشوف محاولة نصب بأي شكل من الأشكال عن طريق الانترنت انه يعمل اللي انا هاقول عليه ده.

بالمختصر المفيد:

موقع وزارة الداخلية أخيرا افتتح قسم خاص ببلاغات النصب عن طريق الانترنت

سواء كان عن طريق الموبايلات وتحويل الرصيد
أوالفيزات المسروقة والخدمات المزيفة
أو حتى الايميلات الوهمية اللي بتيجي تقللك انا ورثت مبلغ كام مليون دولار بس عاوزك تساعدني في تهريبه من البلد واديك ماعرفش كام في المية
أو حتى اي طريقة أخرى يقوم صاحبها باستغلال شبكة الانترنت للايقاع بضحاياه

طب هل أي حد متغاظ من واحد يروح يحط فيه شكوى كده وخلاص ؟؟

لأ طبعا، الوزارة مش بتتخذ أي اجراء ولا أي تحرك غير لما تتعدد شكاوى الناس من نفس النصاب

طب نعمل ايه ونساعد ازاي عشان نوقف الظاهرة المتفشية جديد دي وطالعة في المقدر ؟؟

الموضوع بسيط جدا...
إليكم رابط صفحة بلاغات النصب الالكتروني على موقع وزارة الداخلية:

هنــا

كيفية الابلاغ عن الجرائم الالكترونية

عبر الموقع الالكترونى لوزارة الداخلية على شبكة الانترنت www.moiegypt.gov.eg
اخطار ادارة مكافحة جرائم الحاسبات وشبكات المعلومات بمقر وزارة الداخلية بشارع الشيخ ريحان سواء بالحضور الشخصى او الاتصال بأرقام تليفونات : 27928484/27926071 / 27924090/27924091
استخدام الخط الساخن (108) والذى تم انشاءه مؤخرا لهذا الغرض

http://citizen-service.moiegypt.gov.eg/crimes_web/main.htm

لما تخش عليه هاتلاقي انك لازم تكتب بياناتك الشخصية كاملة،
زي رقم بطاقتك وعنوان سكنك واسمك بالكامل وخلافه
وده لضمان جدية مقدم البلاغ وانه مش واحد بيتسلى وخلاص

وهاتلاقي خانة تكتب فيها تفاصيل الشكوى بتاعتك أو البلاغ بتاعك
ودي طبعا تكتب فيها كل تفاصيل طريقة النصب المستخدمة
ولو تعرف أي بيانات عن النصاب يبقى طبعا لازم تكتبها (مهما كنت شايف انها تافهة أو مالهاش لازمة) لأن كلمة منك على كلمة من غيرك بتجمع جملة مفيدة يقدروا هما يستخدموها للايقاع بذلك النصاب
حتى لو مش عارف اسمه (وده بيكون غالبا) لكن فيه حجات كتير بتسهل عليهم الوصول اليه من غير اسمه
زي رقم موبايله أو ايميله أو اسم عضويته في المنتدى اللي حصلت فيه عملية النصب أو أي حاجة تانية تعرفها
حاجة مهمة جدا بقى وهي انك تحط رابط للصفحة أو الموقع اللي استخدمه النصاب
عشان يدخلوا عليها ويتأكدوا بنفسهم انك مش بتقدم بلاغ كاذب
وكمان عشان يقدروا يشوفوا زوار الموضوع ويحاولوا يتواصلوا معاهم في محاولة منهم للعثور على شخص يكون اتعامل مع النصاب ده ويكون عرف عنه أي معلومة تساعدهم

هاتلاقي كمان مكان لإرفاق ملف أو صورة
وده ليه استخدام مهم جدا جدا
انك تاخد Print Screen من الصفحة المستخدمة للنصب وترفعهالهم في الوزارة
طب لازمتها ايه دي ؟؟؟ عشان فيه بعض المواقع ممكن لما يلاقوا فيها موضوع نصب يقوم المشرف يحذفه
يبقى كده الرابط اللي انت بعتته للوزارة في البلاغ بتاعك مش شغال
وساعتها مش هايقدروا يتأكدا هل بلاغك ده صحيح ولا وهمي
فالصورة بتديهم تأكيد

وللعلم فقسم مكافحة جرائم الانترنت دلوقتي أصبح له سلطة معترف بها دوليا وبيستخدمها في مراسلة أصحاب المواقع لمعرفة الآيبيهات الخاصة بالأعضاء المتهمين بالنصب على صفحات الموقع،،
ومن خلال الآيبي بتتحدد شركة الانترنت المزودة للخدمة،،
وأي حد شغال في أي شركة انترنت أكيد طبعا عارف ان الشركة لازم بتحتفظ بـ Log كامل بالآيبيهات المستخدمة خلال آخر 60 يوم ومن خلاله بتقدر تعرف أنهي آيبي كان على أنهي خط تليفون يوم كام في الشهر والساعة كام بالظبط،، متهيألي بعد كده بيبقى الباقي سهل أوي عليهم انهم يجيبوا النصاب بمجرد التأكد من البلاغات المقدمة ضده ومن تعدد الشكاوي والبلاغات من أشخاص مختلفة

آخر خطوة بتحتاج تملاها في الموقع هي اختيار الجهات المعنية بالتحقيق في الشكوى الخاصة بك
ودي انت بتعملها عشان تسهل عليهم

يعني هاتلاقي خانة فيها كل الجهات التابعة لوزارة الداخلية وبتختار منهم أنهي واحدة اللي انت عاوز الشكوى بتاعتك تروحلها (لأنه طبعا لو الشكوى أو البلاغ بتاعك راح لمكان غلط يبقى مفيش منه فايدة)

هاتختار منهم مديرية أمن المنطقة بتاعتك أو التابعة ليك
ولو تعرف محافظة أو مكان النصاب (وتكون طبعا ذكرته في الشكوى)
يبقى هاتختار كمان مديرية أمن المنطقة اللي هو تابع ليها

وبكده تبقى كملت بلاغك،،

أتمنى نكون كلنا ايد واحدة في ايقاف هؤلاء النصابين والحرامية

الموضوع كله مش هاياخد منك 5 دقايق

بس لما ييجي واحد من دول يعمل موضوع في المنتدى عن حركة تحويل الرصيد مثلا

لازم كلنا نقدم فيه بلاغ

لما عشرة ولا خمستاشر واحد هايقدموا بلاغ ضد نفس الشخص ساعتها بيتأكدوا ان مش كل دول بيتهموه زور أو بيتبلوا عليه وفعلا بيقوموا بتحركاتهم عشان يجيبوه من قفاه (وحصلت والله العظيم)

الموقع أهو مرة تانية:[/]

[size=21]واتمنى ان محدش يشوف حاجة زي كده ويسكت ويقول وانا مالي
الـســـاكــت عـن الـحـــق شـيـطــــان أخـــرس

ولازم نكون كلنا ايد واحدة ونعمل حاجة ايجابية تنفعنا وتطهر المجتمع من النصب

والله الموفق لما فيه الخير